Покистон президенти Ариф Алви вакцинанинг биринчи дозаси билан эмланганидан сўнг коронавирусга чалинди. Бу ҳақда давлат раҳбарининг Twitter’даги саҳифасига асосланиб, «РИА Новости» хабар берди.

Маълум қилинишича, президент ва унинг рафиқаси Самина Алви Исломободда Хитойнинг «Sinopharm» компанияси томонидан ишлаб чиқарилган вакцина билан эмланган.

«Коронавирус учун топширган синов тестим ижобий чиқди. Вакцинанинг биринчи дозасини олгандим, аммо антитаначалар бир ҳафта ўтгач олиниши керак бўлган иккинчи дозадан кейингина пайдо бўлади. Эҳтиёт бўлинг!» — деб ёзган давлат раҳбари Twitter’даги саҳифасига.

Президентнинг рафиқаси Самина Алвининг сўзларига кўра, айни пайтда турмуш ўртоғида коронавирус энгил аломатлар билан ўтмоқда, кайфияти эса яхши. Ўзи ҳам коронавирус учун текширувдан ўтган. Аммо унда салбий натижа қайд этилиб, карантинга олинган.

«Биз вакцинанинг биринчи дозасини олдик, аммо иммунитетни шакллантириш учун вақт керак. Мен ҳаммадан эмлашни давом эттиришини сўрайман», — деб ёзган Самина Алви.

Аввалроқ коронавирус борлигига ишонмаган Танзания президенти вафот этгани маълум қилинган. Шунингдек, коронавирусга қарши эмланган дунё мамлакатлари раҳбарлари ҳақида хабар берилганди.