Чеченистон раҳбари Рамзан Қодиров  Нобель мукофотига номзод сифатида кўрсатилди. Бу ҳақда республика Ахборот ва матбуот вазири Аҳмед Дудаевга асосланиб, «РИА Новости» хабар берди.

Маълум қилинишича, Қодиров сўнгги 15 йил ичида тарихан мураккаб минтақада тинчлик ўрнатгани ва уни сақлашга қўшган улкан ҳиссаси учун номзод сифатида кўрсатилган.

«Минтақа раҳбари ушбу ижобий баҳони халқаро терроризм устидан ғалаба қозонгани ҳамда иқтисодий ва ижтимоий соҳани тез тиклагани учун олди», дея қўшимча қилинган хабарда.

Рамзан Қодиров Нобель мукофотига номзод сифатида кўрсатилган аризани ким топширгани эса очиқланмаган. Дудаевнинг сўзларига кўра, бу маълумотлар сир сақланади.

Халқаро Нобель ахборот маркази президенти Вячеслав Тютюнник ҳам белгиланган уставга биноан ариза топширган шахсни 50 йил давомида ошкор қилиш мумкин эмаслигини таъкидлаган ва лауреат исми 2021 йил 8 октябрь куни Ослода эълон қилинишини айтган.

Маълумот ўрнида, Рамзан Қодиров 2020 йилда Тинчлик ва тараққиёт институти (INSPAD) томонидан ташкил этилган халқаро мукофотга номзод бўлган. Ташкилот унинг динлараро алоқаларни ўрнатишда, шунингдек, гуманитар ва маърифий дастурлардаги алоҳида ролини қайд этган.

Аввалроқ Рамзан Қодиров «Чеченистоннинг сўнгги амири» ўлдирилганини эълон қилганди. Шунингдек, унинг оиласи ҳам ўзини қўриқлаши учун беш йил ичида бюджетдан 13 млн доллардан ортиқ пул сарфлангани хабар берилган.