Тошкент шаҳрида 31 март куни ҳоким, вазир ва ёшлар учрашувида шаҳар ҳокими Жаҳонгир Ортиқхўжаев «Ёшлар дафтари»га киритилган касб-ҳунарга қизиқувчи ёшларнинг ўқув курси пуллари тўлаб берилиши ҳақида айтиб ўтди. Бу ҳақда очиқ мулоқотда қатнашган «Bugun.uz» мухбири хабар қилди.

Эшитувда «Ёшлар дафтари»га киритилган учтепалик қиз шу вақтгача пакет цехида ишлаб келганини, касб ўрганишни исташини билдирди. Шунингдек, у компьютер технологиялари соҳасини эгаллаши учун ўқув курсига қурби етмаслигини айтиб, ҳокимга ёрдам сўраб мурожаат қилди.

Ҳоким унга касб-ҳунар ўқув курси пуллари тўлаб берилишини маълум қилди. Жаҳонгир Ортиқхўжаев бандлик агентлиги мутасаддисига юзланиб, касб-ҳунарга қизиққан ёшларнинг ўқув таъминоти қоплаб берилишини айтди.

Мутасадди бандлик агентлиги бўлими марказида «Ёшлар дафтари»га киритилганлар учун бепул компьютер технологиялари бўйича дарслар йўлга қўйилгани ҳақида хабар берди.

«Бандлик агентлиги қошида компьютер ўқув курси ташкил қилинган. Курс учун маблағ Тошкент шаҳар суди томонидан ажратилган бўлиб, сиз ушбу субсидиядан тўла фойдаланишга ҳақлисиз», — деди бандлик агентлиги ходимаси.

Эслатиб ўтамиз, аввалроқ Ўзбекистондаги мактабларда ишлаш учун АҚШдан 26 нафар ўқитувчи келгани ҳақида хабар берилган эди.