«SpaceX» ва «Tesla» акцияларига эгалик қилувчи Илон Маскнинг бойлиги электромобиллар акцияларининг ўсиши ҳисобига бир суткада 6 миллиард долларга ошди. Бу ҳақда «Forbes Real Time» рейтингига асосланиб, «РИА Новости» хабар берди.

Маълум бўлишича, ҳозирда Илон Маскнинг  бойлиги 169,8 млрд долларни ташкил қилмоқда. Дунёнинг энг бой одамлари рейтингида эса 188,6 миллиард капиталга эга бўлган «Amazon» асосчиси Жефф Безосдан сўнг иккинчи ўринда турибди.

Таъкидланишича, Маск бойлигининг аксарият қисми компаниянинг 21 фоиз акцияларига эгалик қилувчи «Tesla» ҳиссасига тўғри келган.

Маълумот ўрнида, «Tesla» акциялари 4,4 фоизга ўсиб, 691,05 долларни ташкил этган, дастлабки савдоларда эса ўсиш 8 фоизга етган.

Аввалроқ Илон Маск UFC ва «Miss Universe» танлови компаниясининг директорлар кенгашига қўшилиши ҳақида хабар берилган. Шунингдек, унинг «Tesla» компаниясидаги мақоми ўзгаргани маълум қилинган.