АОКАда 7 апрель куни бўлиб ўтган матбуот анжуманида Фавқулодда вазиятлар вазирлиги матбуот хизмати ходими Самандар Ҳикматуллаев шаҳарларда сув тошишининг кузатилиши қурилиш нормалари бузилгани сабаб содир бўлганини айтди. Бу хақда тадбирда қатнашган «Bugun.uz» мухбири хабар қилди.

Вазирлик вакилининг сўзларига кўра, асосан, 28–29 март кунлари Самарқандда, Бухоронинг бир қанча туманларида ҳамда Навоий вилояти туманларида сув тошқини ҳолатлари кузатилган. У бундай тошқинларга сурункали ёмғирнинг кўп ёғиши сабаб бўлганини айтди.

Унинг фикрига қўшимча қилиб, Фавқулодда вазиятлар вазирлиги матбуот хизмати бошлиғи ўринбосари Самандар Ҳикматуллаев бу каби шаҳар ерларида сув тошишига сабаб қурилиш ишлари ва ирригация тармоқларининг ўзбошимчалик билан ўзлаштирилиши экани ҳақида гапирди. Шунингдек, у шаҳар орасида сув тошқинининг кузатилиши қурилиш нормалари бузилгани сабабли эканини таъкидлади.

Гидрометеорология хизмати маркази бўлим бошлиғи Даврон Азимов 12 соат ичида 15 миллиметрдан кўп ёғин кузатилса, бу хавфли ҳолат ҳисобланиши ҳақида айтди. Маълумот ўрнида, 28–29 март кунлари Самарқандда 45 миллиметр (нормадан 3–4 баробар кўп) ёмғир ёққани қайд этилган.

«Янги қурилаётган иншоот доирасида бизнинг ташкилотдан сўровнома олинади. Қурилиш танланган жой талабга жавоб берсагина уни амалга оширишга рухсат этилади», — деди Гидрометеорология маркази ходими.

Аввалроқ Қурилиш вазирлиги Бухорода 9 та бино ноқонуний қурилаётгани юзасидан баёнот берганди.