«Ўзбекфильм» студиясида 8 апрель куни Президентнинг «Кино санъати ва саноатини янги босқичга олиб чиқиш, соҳани давлат томонидан қўллаб-қувватлаш тизимини янада такомиллаштириш тўғрисида»ги фармони қабул қилингани юзасидан кинофорум ўзтаказилди. Унда Фирдавс Абдухолиқов 15 минг квадрат метрдан ортиқ бўлган савдо марказларида мажбурий кинотеатр ташкил этилишини маълум қилди. Бу ҳақда «Bugun.uz» мухбири хабар берди.

«Ўзбеккино» миллий агентлиги директорининг сўзларига кўра, кинотеатрларда жами ўриндиқлар сони 300 тадан ва 4 та кинозалдан кам бўлмаслиги зарур. Фармонга кўра, республика бўйлаб жами ўриндиқлар сони 250 тадан ва 3 та кинозалдан кам бўлмаган кинозаллари мавжуд савдо марказларини қуриш учун тадбиркорларга 25 сотих ер майдонлари бепул ажратилади.

Шунингдек, 2024 йил 1 январга қадар кинотеатрлар рақамли проекторлар билан жиҳозланса, уларни харид қилиш харажатларининг 50 фоизи давлат бюджетидан қоплаб берилиши таъкидланди.

Бундан ташқари, янги ташкил этилган кинотеатрларга дастлабки 3 ой давомида миллий фильмлар бепул етказиб берилиши айтилди.

Аввалроқ Президент фармони билан миллий сериаллар ишлаб чиқаришни қўллаб-қувватлаш учун субсидия ажратилиши, «Ўзбеккино» миллий агентлиги Кинематография агентлиги этиб қайта номлангани ҳақида хабар берилганди.