АОКАда 7 апрель куни бўлиб ўтган матбуот анжуманида Фавқулодда вазиятлар вазирлиги матбуот хизмати ходими Самандар Ҳикматуллаев Ўзбекистонда яқин йилларда сел тошқини сабабли ҳалок бўлган фуқаролар ўлими статистикасини очиқлади. У бу ҳақда «Bugun.uz» мухбирига берган интервьюсида айтиб ўтди.

Вазирлик матбуот хизмати ходимининг таъкидлашича, Тошкент вилояти Бўстонлиқ туманида 2017 йил 13 апрель куни соат 7:50 ларда Боғистон қишлоғида, «Чорвоқ» сув омбори айланма йўлида содир бўлган кўчки оқибатида «Damas» машинасида бўлган 2 нафар фуқаро вафот этган.

Шунингдек, 2018 йилда табиий офат натижасида фуқароларнинг вафот этиши билан боғлиқ 2 та ҳолат қайд этилган:

1.  14 май куни соат 17:30 ларда Самарқанд вилояти Нуробод тумани Кўрғонча МФЙ Лангар қишлоғининг тоғолди ҳудудида дам олишга чиққан 3 нафар фуқаро сел оқимида қолиб, вафот этган.
2.  16 май куни соат 06:30 да Қашқадарё вилояти Чироқчи тумани Мирзатуп МФЙ Сариқамиш қишлоғида 5 нафар фуқаро сел оқимида қолиб вафот этган.

Ходимнинг сўзларига кўра, 2019–2021 йилларда фуқаролар ўлими (селдан моддий зарар кўриш ҳолатлари учраган) билан боғлиқ ҳолат қайд этилмаган.

2020 йилда эса Жиззах вилояти Зомин туманида 29 апрель куни соат 17:50 да кузатилган кучли ёғингарчилик (ёмғир) оқибатида Ширин маҳалласи Қудуқча қишлоғида истиқомат қилувчи 2 нафар фуқарони кучли сел оқимлари оқизиб кетган.

Аввалроқ Ўзбекистонда сув омборларининг сейсмик ҳолатини баҳолаш бўйича экспресс услуб ишлаб чиқилгани ҳақида хабар берилган эди.