Ўзбекистон Мусулмонлар идораси Фатво ҳайъати 10 апрель куни фуқаролардан келиб тушган саволларга жавоб бериб, хусусан, эмлаш рўзани бузиш-бузмаслигига ҳам тўхталиб ўтди.

Маълум қилинишича, тўрт мазҳаб уламолари тери ости, мушаклар ораси ёки ёнбошга укол қилиш билан рўза бузилмаслигига келишган. Чунки рўзани еб-ичиш маъносидаги нарсалар бузади. Еб-ичиш эса одатий йўллар орқали бўлади. Тери тешикларидан ёки ноодатий йўллардан терининг орасига бирор нарса кириши, масалан, илон чақиб олиши (томирдан чақса ҳам), совуқ сувда ғусл қилиш натижасида бадан орасидан ичкарига сув ўтиши рўзани очмаслигига барча уламолар иттифоқ қилгани айтиб ўтилган.

«‘Терининг орасидан ичкарига ёғ каби нарсаларнинг кириши рўзани очмайди’, — дея ‘Ал-Фатово ал-ҳиндия’ китобида таъкидланган. Энди айнан коронавирусга қарши эмлашга келсак, у ҳам тери ости ва мушакка қилинадиган уколлардан бири. Бунинг устига озиқлантирувчи эмас. Юқоридаги фатволарга биноан, рўзадор ҳолда ҳам уни олиш жоиз, бу иш рўзани бузмайди», — деб таъкидлади Фатво ҳайъати.

Шунингдек, эмлаш жараёнлари Рамазон ойига тўғри келиши сабабли бу масалада бир қанча фатво уюшмалари ўз фатволарини эълон қилган. Жумладан, Кувайт вақф вазирлиги, Иордания фатво уюшмаси, Саудия умумий муфтийси ва катта уламолар ҳайъати раиси Шайх Абдулазиз Оли Шайх, Азҳар халқаро электрон фатво маркази, «Дорул ифто» (Миср) фатво маркази рўзадор киши эмлаш олиши рўзани бузмаслигига фатво берган. Чунки рўзани бузувчи нарсалар одатий йўллардан кириб, ошқозонга етиб боради. Эмлашда эса еб-ичиш маъноси йўқ ва у одатдаги йўллардан танага кирмайди.

Аввалроқ Ўзбекистонда Рамазон ойининг бошланиши 13 апрелга тўғри келиши ҳақида хабар берилган эди. Шунингдек, Ўзбекистонда Рамазон ойида масжидларда хатми Қуръон бўлиши ҳақида маълум қилинган эди.