АОКАда 10 апрель, шанба куни ўтказилган брифингда Президент, ижод ва ихтисослаштирилган мактабларни ривожлантириш агентлиги ахборот хизмати раҳбари Дилфуза Собирова Президент мактаблари имтиҳонларига тайёргарлик кўриш учун тест савол-жавоблари китоблари сотилаётгани айтилган хабарга ойдинлик киритди. Бу ҳақда «Bugun.uz» мухбири хабар берди.

Агентлик матбуот котибининг айтишича, Президент мактабларининг имтиҳонларга тайёрлайдиган ўқув курслари мавжуд эмас. Бу каби ўқув курслари, онлайн дарсларнинг Президент мактабларига ҳеч қандай алоқаси йўқ.

Таъкидланишича, Президент, ижод ва ихтисослаштирилган мактабларни ривожлантириш агентлиги томонидан кириш имтиҳонларига тайёрланиш учун ҳеч қандай китоб нашр этилмаган ва у китобларнинг Президент мактабларига дахли йўқ.

Бундан ташқари, Президент мактаби репетецион марказимиз дея, ўқитувчиларга аттестацияда қўшимча балл берилиши шарти билан маълум миқдорда пул талаб қилаётган гуруҳ борлиги ҳам аниқланган.

«Буларнинг ҳеч бирининг Президент мактабларига алоқаси йўқ. Президент мактабларига қабул бўйича барча тасдиқланган маълумотлар Президент, ижод ва ихтисослаштирилган мактабларни ривожлантириш агентлигининг Piima.uz веб-сайти ва шу номдаги расмий каналлари орқали бериб борилади», — деди Президент, ижод ва ихтисослаштирилган мактабларни ривожлантириш агентлиги ахборот хизмати раҳбари Дилфуза Собирова.

Эслатиб ўтамиз, аввалроқ Президент мактабларига қандай ҳужжатлар топширилиши маълум бўлганди.