Тошкент шаҳрида 9 апрель куни метрополитеннинг Чилонзор йўналишидаги «Пушкин» ва «Буюк ипак йўли» бекатлари оралиғида метро вагони эшигини ёпмай ҳаракатланди. «Ўзбекистон темир йўллари» ҳолат юзасидан расмий маълумот берди.

Маълум қилинишича, 9 апрель куни соат 18:40 да «Пушкин» ва «Буюк Ипак йўли» бекатлари оралиғида бу ҳолат содир бўлган. Поезд «Буюк Ипак йўли» бекатга етиб келганда, бу носозлик тузатилган ва одатдагидек ишлашни давом эттирган.

Таъкидланишича, вагон эшиклари автоматик ёпилиш тизимига эга. Метрополитеннинг ҳаракатланувчи таркибининг ҳар бирида локомотив эшиклар сигнализацияси мавжуд ва улар эшикни очиқ ҳолатда ҳаракатланишига тўсқинлик қилади. Шунингдек, бирор буюмнинг механизмга тушиб кетиши оқибатида эшик ёпилмай қолиши мумкинлиги маълум қилинган.

«‘Тошкент метрополитени’ унитар корхонаси фавқулодда вазият юзага келганда, йўловчилардан махсус йўловчи-ҳайдовчи алоқаси ёрдамида поезд ҳайдовчисига хабар беришларини илтимос қилади», дейилади хабарда.

Эслатиб ўтамиз, 18 март куни метронинг ер усти Сергели йўналиши бошланиш жойида икки поезд тўқнашиб кетган эди. Тўхтаб қолган таркибга ортидан келган бошқа бир таркиб келиб урилганди.

Шунингдек, 7 апрель куни «Ғафур Ғулом» бекатида поезд техник сабабларга кўра тўхтаб қолди, оқибатда йўловчилар бошқа таркибга кўчирилди, юрмай қолган поездни бошқа бир поезд шатакка олишига тўғри келганди.

Кейинчалик 8 апрель куни Сергели йўналишида метро ер усти йўлида тўхтаб қолди. Контакт рельсининг кронштейнлари чиқиб кетди, бунинг оқибатида вагонлардаги йўловчилар ер усти метроси бўйлаб пиёда ҳаракатланди.