Хоразм вилояти Шовот туманида 19 ёшли келин ўзини осиб ўлдиргани, уни қайнатаси дўппослагани айтилган хабарлар тарқалган эди. Вилоят прокуратираси ҳолат юзасидан баёнот берди.

Хабарга кўра, Шовот туманида туғилган, Катқалъа маҳалласи Семруг кўчаси 45-уйда яшаган фуқаро Қ.М. 1 апрель куни соат 11:00 ларда ўз уйининг қора молларни сақлаш хонасининг ёғоч тўсинига оқ рангли шпагат ип билан ўзини ўзи осиб, жонига қасд қилган. Ўлим сабабларини аниқлаш мақсадида Республика суд-тиббий экспертизаси илмий-амалий марказига суд-тиббий экспертиза тайинланиб, мурда текширувдан ўтказилган. Дастлабки эксперт маълумотига кўра, фуқаро Қ.М.нинг ўлимига ўзини ўзи осиши оқибатидаги асфикция сабаб бўлган.

Маълум қилинишича, марҳума 2020 йил октябрь ойида 2001 йил 4 августда туғилган М.Й. билан турмуш қуриб, унинг оиласи билан Катқалъа маҳалласида истиқомат қилиб келган. Шу билан бирга, дастлабки тўпланган ҳужжатларга кўра, фуқаро Қ.М. ёки унинг оила аъзолари турмуши давомида ҳуқуқни муҳофаза қилувчи органларга ёки маҳалла фуқаролар йиғинига шикоят қилмаган. Турмуш ўртоғи М.Й. ёки оила аъзолари муқаддам судланмаган, нотинч оила ёки бошқа бир ҳолатлар юзасидан рўйхатда турмайди.

Ижтимоий тармоқлардаги хабарларда келиннинг ўзини осишига қайнатасининг дўппослагани сабаб бўлгани айтилган. Бунга эса келин қўшнисидан аммасининг уйига боришга йўлкирага 5 минг сўм қарз олгани учун мана шундай келишмовчилик рўй бергани қайд этилган.

Қайд этилишича, ҳозирда Шовот туман прокуратураси томонидан терговга қадар текширув ҳаракатлари олиб борилаётган бўлиб, якуни юзасидан қонуний қарор қабул қилиниши таъминланади. Вилоят прокуратураси томонидан терговга қадар текширув ҳаракатлари назоратга олинган.

Аввалроқ Самарқандда 4 йигит келинойисига гап отган эркакни бўғиб ўлдириб, жасадини каналга оқизиб юборгани ҳақида хабар берилганди.