Пенсия жамғармасида жисмоний ва юридик шахслар ҳамда давлат органлари ўртасидаги низоларни судгача ҳал қилиш бўйича апелляция кенгаши ташкил этилди. Бу ҳақда Жамғарма матбуот хизмати хабар берди.

Хабарга кўра, апелляция кенгашининг асосий вазифалари қуйидагилардан иборат:

• жисмоний ва юридик шахслар ҳамда давлат органлари ўртасида юзага келадиган низоларни судгача кўриб чиқиш ва хулоса қабул қилиш орқали уларни ҳал қилиш чораларини кўриш;
• мурожаатни кўриб чиқишда қонун ҳужжатида турлича талқин этилиши мумкин бўлган нормалар аниқланган, у амалиётда нотўғри ёки зиддиятли тарзда қўлланилган тақдирда, уларни белгиланган тартибда расмий шарҳлашни ташкиллаштириш бўйича чораларни кўриш;
• мурожаатни кўриб чиқишда аниқланган қонун ҳужжатларидаги бўшлиқларни бартараф этиш бўйича таклифлар киритиш.

Маълум қилинишича, апелляция кенгаши мурожаатларни кўриб чиқишда:

• тенг ҳуқуқлилик, холислик, қонунийлик, коллегиаллик ва ҳуқуқни қўллаш амалиётининг бир хиллигини таъминлаш;
• мурожаат этувчиларнинг ҳуқуқлари ва қонуний манфаатларига риоя қилиш;
• жисмоний ва юридик шахсларнинг мурожаатлари тўғрисидаги қонун ҳужжатларида бартараф этиб бўлмайдиган барча қарама-қаршиликлар ва ноаниқликларни мурожаат этувчининг фойдасига талқин қилиш принципларига асосланади.

Аввалроқ Ўзбекистонда пенсия ва нафақа олувчилар сони маълум қилинганди. Шунингдек, Ўзбекистонда айрим пенcионерларнинг ойлик пенсия миқдори оширилиши ҳақида хабар берилган.