Хива шаҳрининг «Ичан қалъа» музейидан 19 апрель, душанба куни қадимий қудуқ топилди. Бу ҳақда Фанлар академияси ахборот хизмати хабар берди.

Маълум қилинишича, 19 апрель куни Хива шаҳрининг «Ичан қалъа» давлат музей қўриқхонаси ҳудудидаги таъмирлаш ишлари чоғида бундан бир неча йиллар олдин ёпиб ташланган қудуқ оғзи очилган. Бироқ унинг ноанъанавий кўриниши турли фаразларга сабаб бўлмоқда.

Қудуқ бошқа сув қудуқлари каби пастдан тепага торайиб кетмасдан, унинг барча қисмида диаметри бир хил, яъни 2,6 метрни ташкил қилган. Чуқурлиги 5,6 метрга тенг. Қадимги анъанага кўра қудуқнинг асоси, яъни пойдевор қисмига Хоразм шароитида кўп учровчи дарахт, тут ёки гужумдан ёғоч пойдевор ўрнатилган. Ёғочнинг қалинлиги 16 сантирметр атрофида бўлган.

Шунингдек, қудуқ деворларига 25х25х6 сантирметр ўлчамдаги пишган ғишт нозик дид билан терилган. Ғиштлар юзасида ромбсимон белгилар мавжуд. Қудуқ тахминан бундан 100-150 йил олдин қурилган. Ҳозирги кунда мазкур қудуқдан айнан нима мақсадда фойдаланилгани масаласи илмий жиҳатдан ўрганилмоқда.

Аввалроқ Тошкент вилоятида Қорахонийлар даврига оид 427 та танга топилгани хабар қилинганди. Шунингдек, Тошкентдаги Сигиртепа ёдгорлиги атрофидан кўза топилгани маълум қилинган.