«SpaceX» ва «Tesla» асосчиси Илон Маск бир кунда 5,1 миллиард доллар йўқотди. Бунга «Tesla» электромобилининг автоҳалокатга учраши сабаб бўлгани ҳақда «Forbes» хабар берди.

Маълум бўлишича, АҚШнинг Техас штатида «Tesla» электромобилининг ҳайдовчисиз бошқарилгани тахмин қилинаётган автоҳалокатда икки киши ҳалок бўлган. Катта тезликда ҳаракатланаётган машина дарахтга урилиб, ёниб кетган. Воқеа жойига етиб келган қутқарувчилар машинани деярли тўрт соат давомида ўчирган. Полиция ҳодимлари машинада икки кишининг жасадини топган, қурбонлардан бири олд йўловчи ўриндиғида, иккинчиси орқа ўриндиқда бўлган.

Дастлабки маълумотларга кўра, машина автопилот режимида бўлгани таъкидланган. Илон Маск бунга жавобан ЙТҲга учраган «Tesla» автомобилида автопилот режими ўрнатилмаганини айтган.

Автоҳалокатга оид хабарларнинг кенг тарқалиши ортидан 24 соат ичида Маскнинг бойлиги 5,1 миллиард долларга, «Tesla» акциялари 3,4 фоизга камайган.

Аввалроқ Илон Маск «Starship» космик кемаси нега портлаб кетганини айтгани ҳақида хабар берилганди. Шунингдек, Илон Маск бир суткада 6 млрд долларга бойигани маълум қилинган.