Коронавирусга қарши кураш штаби аъзоси Севара Убайдуллаева 20 апрель куни «Bugun.uz» мухбирига берган интервюсида Ўзбекистон чегараларида карантин чоралари қай ҳолатда кучайтирилишини маълум қилди.

Маълум қилинишича, бутун дунёда тасдиқланган статистик формулага кўра, беморлар сони ошиб борган сари карантин чоралари янада кучайтирилади. Ўзбекистонда ҳар куни 300 дан ортиқ касалланиш ҳолати аниқланмоқда. Бундай ҳолларда таълим муассасалари онлайн тизимга ўтказилади. Шунингдек, кўрсаткичлар сони 400 дан ошса, чегараларда карантин кучайишига сабаб бўлади.

Мутахассиснинг сўзларига кўра, беморлар сони ортгани сари тиббий хизмат кўрсатиш имконияти ҳам чекланади. Бунга сабаб қилиб у республика аҳолиси сонига нисбатан шифокорлар етарли эмаслигини келтириб ўтган.

«Вирус ҳаракатини назорат қилиш учун карантин жорий этилиши керак. Агар аҳоли карантин қоидаларига риоя қилмаса, чекловларни кучайтириб бориш зарур. Йўқса, бу инфекция одамдан одамга мутацияга учраб, янада оғир шаклини келтириб чиқаришига сабаб бўлади. Бундан ташқари, касалланиш кўпайиб борган сари беморларга кўрсатиладиган тиббий хизмат имконияти чекланади. Чунки бизнинг аҳолимиз сонидан келиб чиқиб шифокорлар сони етарли даражада эмас», — дейди Севара Убайдуллаева.

Шунингдек, у ҳар бир фуқаро карантин талабларини бажариши кераклигини таъкидлаган. Хусусан, бу борада аҳолисига ишонмайдиган давлатлар карантин талабларини кучайтираётганини қайд этган.

«Иқтисодий барқарорликни таъминлаш мақсадида ҳар бир фуқаро онгли равишда қоидаларга риоя қилиши керак. Аҳолиси карантин қоидаларига амал қилишига кўзи етмаган давлатлар қатъий чораларни қўлламоқда. Лекин бизда давлатимиз аҳолига ишонч билдириб, масъулиятни ҳар бир инсонга топширди. Биз касалликни енгишда 2020 йилда барқарорликка эришган эдик. Касаллик тарқалиши олдини олишнинг имкони бор экан-ку. Барқарорлик даражаси шу кўрсаткичда сақланиб турилса, карантин бўлмайди. Қолаверса, вакцина кириб келмоқда. Биз бу билан касалликни енгиб чиқишга қадам қўйишимиз мумкин», — дейди у.

Аввалроқ Ўзбекистонда 18 апрелдан карантин қоидалари кучайтирилгани, масжидларда Таровиҳ намозларида карантин қоидаларига тўлиқ амал қилиш юзасидан видеоселектор йиғилиши ўтказилгани ҳақида хабар берилганди.