Ўзбекистонда 2017–2021 йилда нечта жоме масжиди очилгани айтилди. Бу ҳақда Дин ишлари бўйича қўмита раисининг биринчи ўринбосари Музаффар Комилов АОКАда 21 апрель, чоршанба куни ўтказилган брифингда маълум қилди, дея хабар бермоқда «Bugun.uz» мухбири.

Музаффар Комиловнинг сўзларига кўра, ўтган 2017–2021 йиллар мобайнида республикада 49 та янги жоме масжид очилган. Хусусан, 2021 йилда 9 та янги масжид ўз фаолиятини бошлаган. Шунинг билан ҳозирда масжидларнинг умумий сони 2088 тани ташкил этган. Улардан, 2016 таси жоме, 72 таси эса маҳаллий масжид мақомида.

«Умуман олганда, ушбу даврда 69 та диний ташкилотлар рўйхатдан ўтган. Жумладан, 49 та янги масжидлар (2017 — 4, 2018 — 13, 2019 — 10, 2020 — 13, 2021 — 9) ва 3 та мадраса ташкил этилди ҳамда бошқа конфессияларга мансуб 17 та диний ташкилотлар рўйхатдан ўтказилди ва уларнинг умумий сони 191 тага етди», — дейди у.

Таъкидланишича, ушбу йилларда Ислом цивилизацияси маркази томонидан Ўзбекистонда Марказий Осиё мусулмон мутафаккирларининг жаҳон цивилизацияси ривожидаги ролига бағишланган 10 дан ортиқ китоб ва рисолалар тайёрланган. Имом Термизий халқаро илмий-тадқиқот маркази томонидан Имом Термизий, Ҳаким Термизий ва термизлик бошқа олимларнинг 20 дан ортиқ асарлари ўзбек тилига таржима қилинган.

Бундан ташқари, Имом Бухорий халқаро илмий-тадқиқот маркази томонидан Имом Бухорий, Имом Мотуридий, Имом Насафий ва бошқа улуғ алломалар асарларининг аксарияти таржима қилиниб, 50 дан зиёд китоб нашр этилган.

Аввалроқ Қозоғистонда Марказий Осиёдаги энг катта масжиднинг қурилиш ишлари бошлангани ҳақида хабар берилганди. Шунингдек, масжидларда Таровиҳ намозларида карантин қоидаларига тўлиқ амал қилиш юзасидан видеоселектор йиғилиши ўтказилгани маълум қилинганди.