«SpaceX» ва «Tesla» раҳбари Илон Маск инсоният учун Ойда доимий яшайдиган база, Марсда эса шаҳар яратиш кераклиги ҳақида гапирди. Бу ҳақда «The Independent» нашри хабар  берди.

Келтирилишича, Маск 23 апрель, жума куни «Crew Dragon» космик кемаси учирилгандан сўнг ўтказилган матбуот анжуманида инсоният Ойда узоқ вақт бўлмагани, у ерда яшаш учун доимий база қуриши кераклиги ҳақида айтган.

«Биз Ойда узоқ вақт бўлмадик. У ерга қайтиб, Ойда доимий яшайдиган база қуришимиз керак. Кейин Марсда шаҳар яратиш керак. Шунда инсоният космик турга айланади, бир эмас, кўп сайёра аҳолиси бўлади», — дея қайд этган «SpaceX» раҳбари.

Шунингдек, у АҚШ Миллий аэронавтика ва фазони тадқиқ қилиш бошқармаси (NASA)нинг 2024 йилда Ойга қайтиш режасини ҳақиқатан ҳам амалга ошириш мумкинлиги ҳақида фикр билдирган. Маълумот ўрнида, 2019 йилнинг баҳорида NASA «Artemis» Ой дастури лойиҳасини эълон қилган. Лойиҳанинг якуний босқичида астронавтларни 2024 йилда Ойга қўнишини амалга ошириш режалаштирилган. Бироқ NASA ушбу шартлар ўзгариши мумкинлигини таъкидлаган.

Аввалроқ Марсда қуриладиган илк шаҳар суратлари эълон қилингани ҳақида хабар берилганди. Шунингдек, Илон Маск Марсга қачон ракета учиришини айтгани маълум қилинган.