Тошкент шаҳрида эркак 6 нафар танишини пул эвазига қўриқлаш хизматига олиб кириб қўйишини айтиб, улардан 2700 доллар пора олаётган пайтда қўлга тушди. Бу ҳақда Миллий гвардия ахборот хизмати хабар берди.

Хабарга кўра, 21 апрель куни Тошкент шаҳар прокуратураси, Миллий гвардия ва ДХХ ходимлари ҳамкорлигида тезкор тадбир ўтказилган. Унда эркак фуқаролардан олдиндан 800 доллар олгани аниқланган. Шунигдек, у Тошкент шаҳар Миробод туманида келишилган жойда 2700 доллар пора олаётган пайтда далилий ашё билан қўлга олинган.

Ҳозирда мазкур ҳолат юзасидан Тошкент шаҳар прокуратураси томонидан суриштирув ишлари олиб борилмоқда.

«Ҳурматли фуқаролар, пул эвазига қайси соҳага бўлишидан қатъи назар, ишга ёки ўқишга киритиб қўяман, деб ёлғон ваъда берувчиларга ишониб қолманг», дейилади хабарда.

Эслатиб ўтамиз, аввалроқ Андижонда солиқ бош инспектори 15 миллион пора билан қўлга тушгани, шунингдек, Андижонда халқ таълими бўлими бошлиғи 900 доллар пора билан ушлангани хабар қилинганди.