Фарғона шаҳрида 22 апрель куни 19 ёшли йигит спиртли ичимлик олиб келишга мажбурлаган икки эркакни пичоқлади. Бу ҳақда Тергов департаменти ахборот хизмати хабар берди.

Маълум қилинишича, 22 апрель куни соат 16:20 ларда 19 ёшли А.О. Фарғона шаҳри Янги аср кўчасида яшовчи танишининг олдига келган вақтида унинг йўлини маст ҳолатда бўлган 48 ёшли С.А. ва 44 ёшли Н.Т. тўсган.

Таъкидлинишича, С.А. ва Н.Т. йигитни қурилиши якунланмаган бинога олиб кирган ва уни спиртли ичимлик олиб келишга мажбур қилган. Ҳақоратли сўзлар билан мазах қилгани туфайли йигит ёнида бўлган ошхона пичоғи билан уларга жароҳат етказган.

Ҳолат юзасидан А.О.га нисбатан Жиноят кодексининг 104-моддаси 2-қисми «л» банди (Қасддан баданга оғир шикаст етказиш) билан жиноят иши қўзғатилиб, процессуал тартибда ушланган.

Аввалроқ Навоийда 24 ёшли йигит рашк сабаб ўзидан катта қизни пичоқлагани хабар қилинганди. Шунингдек, Бухорода маст эркак жанжал сабаб қўшнисини пичоқлагани маълум қилинган.