NASA вертолёти юборган Марснинг ҳаводаги биринчи рангли тасвири эълон қилинди
«Ingenuity» вертолёти Марс атмосферасида иккинчи парвози пайтида олинган рангли фотосуратини юборди. Бу ҳақда АҚШ Миллий аэронавтика ва фазони тадқиқ қилиш бошқармаси (NASA) сайтида хабар берилди.

Расмда вертолётнинг сояси, қўниш оёқларининг учлари, шунингдек вертолётни Марсга етказиб берган «Perseverance» космик қурилмасининг ғилдирак излари кўринган. «Ingenuity» вертолёти иккинчи парвоз пайтида нафақат оқ-қора навигация камераси ёрдамида, балки рангли камера билан ҳам атрофни суратга олган. Нашр қилинган расм сайёра юзасидан 5,2 метр баландликдан олинган.
Таъкидланишича, 25 апрель, якшанба куни «Ingenuity» юз метрлик қийин парвозни амалга ошириши режалаштирилган. У беш метр баландликка кўтарилиб, 50 метр ён томонга учиб, ўгирилиб, яна ортга қайтади. Шунингдек, унинг максимал парвоз тезлиги сониясига 0,5 метрдан 2 метргача кўтарилади ва парвоз вақти тахминан 80 сонияни ташкил этади.
Маълумот ўрнида, «Ingenuity» вертолёти 2021 йил 19 апрелда Марсда биринчи марта бошқариладиган парвозни амалга оширган ва камёб қурилмалар атмосферада ишлашга қодир эканини исботлаган. 22 апрель куни қурилма ҳавода 51,9 сонияни ўтказган ва шу вақт ичида беш метр баландликка кўтарилиб, жами тўрт метрга учиб, ўз ўқи атрофида уч марта айланган.
Аввалроқ NASA марсоходи тарихда илк бор Қизил сайёра атмосферасидан кислород ажратиб олгани ҳақида хабар берилганди. Шунингдек, NASA Марсдаги об-ҳаво ҳақида илк ҳисоботни тайёрлагани маълум қилинган.