Тошкент шаҳри Учтепа туманида интернетда танишган қизининг кийимсиз фото ва видеоларини тарқатиб юбормаслик учун ундан салкам 1000 доллар талаб қилган йигит қўлга тушди. Бу ҳақда Ички ишлар вазирлиги ахборот хизмати хабар берди.

Маълум қилинишича, Ж. исмли йигит Telegram’даги гуруҳларнинг бирида Н. исмли қиз билан танишиб қолган. Шундан сўнг у қизнинг ишончига кириб, унинг кийимсиз ҳолатдаги фото ва видео тасвирларини олган ва тасвирларни интернетда тарқатиш, дискка кўчириб унинг оиласига юборишини айтиб, қўрқитган. Суратларни тарқатмаслик учун қиздан 500 АҚШ доллар беришини талаб қилган.

Қиз эса унга умумий нархи 4 миллион сўм бўлган аёллар узугини берган. Орадан бир оз вақт ўтгач, йигит қиздан яна пул беришини талаб қилиб, ундан 450 АҚШ доллари сўраган. Қиз эса бу сафар ҳолат юзасидан ҳуқуқ-тартибот идораларига мурожаат қилган.

Ушбу ҳолат Тошкент шаҳар Учтепа туман судида кўриб чиқилган. Ўтказилган тергов давомида йигит шу тариқа яна 4 нафар қиздан катта миқдордаги пулларни ундириб келгани аниқланган.

Аввалроқ Наманганда танишини кийимсиз ҳолда видеога олиб, тарқатиб юбормаслик учун 20 миллион сўм сўраган эркаклар ушлангани ва Самарқандда танишининг расмларини тарқатмаслик учун 400 доллар сўраган шахс ушлангани хабар қилинган эди. Шунингдек, Самарқандда институт ўқитувчиси 21 ёшли қиздан шахсий фотосуратларни тарқатиб юбормаслик учун 400 доллар талаб қилгани маълум қилинган.