АҚШнинг Нью-Мексико штати, Албукерке шаҳри маъмурияти АҚШнинг собиқ президенти Дональд Трампдан қарзларни ундириш учун қарз йиғувчиларни йўллади. Бу ҳақда «Bussines Insider» хабар берди.

Нашр маълумотига кўра, қарз йиғувчиларнинг мақсади Трампни 211 минг доллар миқдоридаги қарзни тўлашга мажбур қилиш ҳисобланади. Собиқ президентдан бир неча бор қарзни тўлаш сўралган, аммо ушбу мурожаат жавобсиз қолган.

Таъкидланишича, Трамп 2019 йил 16 сентябрда ўтказган митингидан сўнг 211 минг доллар қарздор бўлган. Маҳаллий ҳокимият вакиллари ушбу миқдор хавфсизлик харажатлари учун товон сифатида тўланиши кераклигини айтган.

Собиқ президентнинг матбуот котиби Жейсон Миллер Трамп компанияси қарздор эмаслигини таъкидлаб, президент хавфсизлигини таъминлаш билан боғлиқ барча масалалар Махфий хизматга мурожаат орқали ҳал қилиниши кераклигини айтган.

Маълумот ўрнида, Трамп кампаниясининг митинглар пайтида тўпланган қарзларни тўламаганликда айбланиши биринчи ҳолат эмас. Хусусан, Миннеаполис унинг 2019 йил октябрдаги тадбирда 543 минг доллар қарздорлигини такидлаган.

Аввалроқ Дональд Трамп ўз сайтини ишга туширгани ҳақида хабар берилганди. Шунингдек, Трамп президентлик даврида бойлигининг қанчасини йўқотгани маълум қилинган.