AОКAда 26 апрель, душанба куни ўтказилган брифингда ССВ ходими Севара Убайдуллаева «Спутник Ⅴ» вакцинасини олган бемор кейинги босқичларда АҚШ вакцинасини олиши мумкин ёки мумкин эмаслигига аниқлик киритди. Бу ҳақда «Bugun.uz» мухбири хабар қилди.

Коронавирусга қарши кураш штаби аъзосига кўра, вакциналарни эмлаш тартиби (яъни 2 ёки 3 марта) ҳар бир вакцинада турличадир, бу тартибнинг сақланиши айнан шу вакцина ёрдамида организмда энг юқори даражада антитаначалар ҳосил қилиш имкониятини беради.

Шунингдек, бир вакцинани бошлагандан кейин бошқа вакцина билан эмланса, бошқа вакцина билан эмланганини биринчи дозаси деб баҳоланиб, шу вакцинани охиригача олиб бориш керак. Бунда, бирламчи олинган «Спутник Ⅴ» вакцинаси тўлиқ олинмаган бўлиб, самарасиз эмлаш деб баҳоланади.

«Организмга бўлган зарарли таъсири борасида тўхталсак, вакцинация жараёни бугунги кунда бутун дунёда олиб борилмоқда, жумладан, бизнинг давлатимизда ҳам. Бундай ҳолатларда инсон организмига зарарли таъсири бор-йўқлиги борасида тадқиқотлар натижаси ҳали нашр этилмаган. Чунки барча давлатларда белгиланган талаб ва тартибга кўра эмлашлар олиб борилмоқда, агарда бундай аралашган ҳолатлар кузатилгани аниқланса, албатта, ўрганилади ва инсон организмига бўлган таъсири тўғрисида маълумотлар нашр этилади», — деди Севара Убайдуллаева.

Шу билан бирга, ССВ ходими «Спутник Ⅴ» вакцинасини олган бемор кейинги босқичларда АҚШ вакцинасини олиши мумкин эмаслигини айтди ҳамда коронавирус инфекциясига қарши эмланаётганлар қайси вакцинада эмланишни бошлаган бўлсалар, шу вакцина билан барча босқичларида эмланишлари кераклигини таъкидлади.

Аввалроқ «Спутник V» вакцинасининг Ўзбекистонга келтирилган бошқа вакциналардан фарқи маълум қилинган эди.