АОКАда 26 апрель, душанба куни ўтказилган брифингда Истеъмолчилар ҳуқуқларини ҳимоя қилиш агентлиги бошқарма бошлиғи Одил Мирзааҳмадов «Uzbekistan Airways»нинг салкам 196 миллион сўмлик чипталари истеъмолчиларга қайтариб берилганини маълум қилди. Бу ҳақда «Bugun.uz» мухбири хабар берди.

Агентлик ходимининг айтишича, ўтган давр давомида турли сабабларга кўра авиачипталардан фойдалана олмагани сабабли ушбу авиачипталарнинг пуллари қайтариб берилишида амалий ёрдам сўраб агентликка 358 та мурожаат келиб тушган. Шундан 132 таси «Uzbekistan Airways» — Ўзбекистон ҳаво йўллари, қолган 206 таси хорижий авиакомпаниялар чипталарига тўғри келади.

«Мазкур мурожаатларни тегишли авиакомпаниялар билан бирга ўрганиб чиқиш натижасига кўра, Ўзбекистон ҳаво йўллари авиакомпаниясига тегишли 92 та 195,4 миллион сўмлик, хорижий авиакомпанияларга тегишли 38 та 95,4 миллион сўмлик авиачипталар истеъмолчиларга қайтариб берилган.

Қолган 228 та авиачипталар бўйича 1 йилдан 3 йилгача бўлган даврда ушбу авиакомпаниянинг хоҳлаган йўналиши бўйича, сотиб олинган авиачипта нархига нисбатан истеъмолчи фойдасига 5 фоиздан 15 фоизгача бонус қўллаган ҳолда фойдаланиш бўйича ваучерлар расмийлаштириб берилган», — деди Одил Мирзааҳмадов.

Аввалроқ «Uzbekiston Airways»га авиачипталар сотиб олишдаги талабларни соддалаштириш юзасидан cенатор сўрови юборилгани ҳақида хабар берилганди. Шунингдек, мазкур компания барча йўналишларда нархлар пасайтирилишини маълум қилган.