Давлат солиқ қўмитаси ва унинг таркибий бўлинмалари ходимлари Бирлашган касаба уюшмаси Олий Мажлис Қонунчилик палатаси депутати Расул Кушербаевни судга берди. Бу ҳақда қўмита ахборот хизмати хабар берди.

Хабарга кўра, депутат устидан ариза Фуқаролик ишлари бўйича Шайхонтоҳур туманлараро судига киритилган. Бунга Расул Кушербаевнинг «Сўз блогерларга» кўрсатувининг 23 февралдаги сонида айтган ҳақоратомуз сўзлари сабаб бўлган.

Қайд этилишича, қўмита депутат ўзининг сўзларига раддия бериши ва кечирим сўраши лозимлигини айтган. Депутатнинг хатти-ҳаракатлари солиқ органларига 4,6 миллиард сўм миқдорида зарар етказгани даъво қилинмоқда.

Эслатиб ўтамиз, аввалроқ Расул Кушербаев ҳозирги кунда табиий газ учун ўрнатилаётган янги онлайн ҳисоблагичлардан норозилар кўпайиб бораётганлиги хусусида фикр билдирган эди.