Ички ишлар вазирлиги академиясида 27 апрель, сешанба куни бўлиб ўтган матбуот анжуманида академия раҳбари Рустам Хотамов Ўзбекистонда ички ишлар органи ходимлари ва аҳоли ўртасида кўпаяётган зиддиятларга изоҳ берди. Бу ҳақда «Bugun.uz» мухбири хабар қилди.

Академия раҳбарининг таъкидлашича, бу зиддиятларга профилактика инспекторларининг жуда оз қисми академияда таҳсил олгани, бундан ташқари, карантинда кучайтирилган тартибда иш ташкил қилинганини сабаб қилиб кўрсатган.

Маълум қилинишича, Ички ишлар вазирлиги ҳар қандай ходим содир этган ножўя хатти-ҳаракатига муросасиз муносабатда бўлган ва кескин чоралар кўрган. Тизим шаънига путур етказган ходимлар бу соҳадан бутунлай четлатилган.

«Профилактика инспекторлари томонидан этикага зид ҳолатлар кузатилаётганига ижтимоий тармоқлар орқали гувоҳ бўлиб турибмиз. Бунинг келиб чиқиш сабабларидан бири шуки, маҳаллага биттадан профилактика инспекторлари учун штат яратилгандан сўнг кадр етишмагани учун фуқаролик олий таълим муассасаси битирувчиларини 6 ойлик курсда ўқитиб, махсус лейтенант унвони бериб, органга ишга олган эдик», — дейди Рустам Хотамов.

Шунингдек, у бундай камчиликларнинг олдини олиш учун профилактика инспекторларини академияда тайёрлаш йўлга қўйилаётганини маълум қилди. Унда профессор ўқитувчилар амалиётда бўлаётган камчиликларни ўрганган ҳолда уларда касбий маданият, этика, фуқаролар билан бўладиган муносабатда ўзини қандай тутиш кераклигини ўргатиши таъкидланган.

Аввалроқ Тошкент вилоятида профилактика инспектори фуқарони ноҳақ қамагани айтилган видеога муносабат билдирилгани, Тошкентда профилактика инспектори ерда ётган аёлни тепаётгани акс этган видео бўйича изоҳ берилгани ҳақида хабар қилинганди.