Вазирлар Маҳкамасининг 21 апрелда қабул қилинган қарори билан, тадбиркорлик субъектлари томонидан автомобиль йўлларида йўл ҳаракати қоидалари бузилганини аниқлаш учун камера ўрнатиш ва эксплуатация қилиш тартиби тасдиқланди.

 Унга кўра, автоматлаштирилган камералар ўрнатилиши мумкин бўлган жойлар «E-Ijro auksion» платформасида онлайн аукционга қўйилади ҳамда тадбиркорларга ушбу ҳудудлардаги сўнгги 2 йилда аниқланган қоидабузарликлар тўғрисидаги маълумотлар эълон қилинади.

Ўрнатиладиган жойларнинг бошланғич нархи 735 минг сўмдан 8 миллион 575 минг сўмгача этиб белгиланди. Шунингдек, ҳукуматнинг «Йўл ҳаракати хавфсизлигини таъминлашга хусусий секторни жалб қилиш чора-тадбирлари тўғрисида»ги қарори лойиҳасига биноан 2021–2022 йилларда жами 3356 та интеллектуал видеокамера ва 763 та стационар радарларни ўрнатиш режалаштирилмоқда.

Тизим ишга туширилган кундан бошлаб тадбиркорларга 1 йил давомида қайд этилган қоидабузарликлардан ундирилган жарима суммасининг 50 фоизи, 1 йил ўтгач эса 25 фоизи ўтказиб берилади.

Аввалроқ Ўзбекистонда тадбиркорлар томонидан қоидабузарликни аниқлаш учун камералар ўрнатиш тартиби белгилангани ва Ўзбекистонда қоидабузарликни аниқлаш учун камера ўрнатган тадбиркорлар жаримадан қанча пул олиши хабар қилинган эди. Шунингдек, тадбиркорларга йўлларга камералар ўрнатиш ҳуқуқининг берилиши 5 та афзалликка эга экани маълум қилинган.