«Аҳоли Президентни сайлай олади, нега мансабдорларни сайлолмас экан?» — Расул Кушербаев
Олий Мажлис Қонунчилик палатаси депутати Расул Кушербаев аҳоли мансабдорларни сайлашга тайёр эканини таъкидлади. Бу ҳақда у YouTube’даги «Аlter Ego» лойиҳасига берган интервьюсида айтиб ўтган.
Депутат агар имконият бўлганда, давлат тузилмасида мансабдорларнинг сайлов орқали лавозимга тайинланишини йўлга қўйишини маълум қилган.
«Мен давлат тузилмасида, биринчидан, мансабдорларнинг сайлов орқали лавозимга тайинланишини йўлга қўйган бўлардим. Жойлардаги прокурор, ҳокимларнинг тайинланишини, удан кейин вилоятлардаги ИИБ бошлиқларини, шунингдек, вазирларни ҳам очиқ тайинловлар орқали тайинланишини йўлга қўяр эдим», — дейди у.
Расул Кушербаев, шунингдек, аҳоли бундай сайловларга тайёр эканини алоҳида таъкидлаб ўтган.
«Одамлар бунга тайёр. Ахир улар Президентни, депутатларни сайлайди-ку. Президент бу давлат етакчиси, унинг алоҳида сиёсий иродаси бор. Агар аҳоли шундай инсонни сайлай олар экан, нима учун бошқа мансабдорларни сайлай олмайди. Мен, шахсан, улар тайёр деб ўйлайман», — дейди депутат.
Мавзуга доир: «Халқ жунглидан чиққан эмас. Фикр айтишни билади» — Расул Кушербаев ҳокимлик сайловлари ҳақида
Эслатиб ўтамиз, аввалроқ Расул Кушербаев ҳокимлар сайлов йўли билан сайланишга тайёр эмас деб ҳисоблашини айтган эди. «Сайлашга ҳали халқимиз тайёр эмас, деган гапни айтган инсон аслида қўрқади», деган эди депуатат ўз интервьюсида.
