Халқ депутатлари Наманган шаҳар кенгашининг навбатдан ташқари сессиясида Янги Наманган туманига ҳоким тайинланди. Бу ҳақда вилоят ҳокимлиги ахборот хизмати хабар берди.

Хабарга кўра, сессияда Наманган вилоятининг Наманган шаҳри таркибида Янги Наманган туманини ташкил этиш бўйича масала кўрилган. Вилоят ҳокими Шавкат Абдураззақов Янги Наманган тумани ҳокимлигига шу пайтга қадар Наманган вилояти ҳокимлигининг саноатни ривожлантириш, капитал қурилиш, коммуникациялар ва коммунал хўжалик масалалари котибияти мудири бўлиб ишлаб келган Жобир Абдуллаев номзодини таклиф қилган.

Қайд этилишича, депутатлар ва фаоллар номзод юзасидан фикр-мулоҳазаларини билдирган. Номзод улар томонидан маъқулланган. Жобир Абдуллаев 1984 йилда Наманган шаҳрида туғилган. 2005 йилда Наманган муҳандислик педагогика институти, 2008 йилда Наманган муҳандислик педагогика институтини тамомлаган.

У 2008–2019 йиллар давомида «Наманган электр тармоқлари» очиқ акциядорлик жамиятида турли масъул лавозимларда меҳнат қилган. 2019–2020 йилларда Наманган шаҳар ҳокимининг саноатни ривожлантириш, капитал қурилиш, коммуникациялар, коммунал хўжалик масалалари бўйича ўринбосари вазифасини бажарувчи бўлиб ишлаган. Жобир Абдуллаев 2020 йилдан то шу кунга қадар Наманган вилояти ҳокимлигининг саноатни ривожлантириш, капитал қурилиш, коммуникациялар ва коммунал хўжалик масалалари котибияти мудири сифатида фаолият юритиб келган.

Эслатиб ўтамиз, Олий Мажлис Сенатининг 24 апрелдаги ўн тўртинчи ялпи мажлисида Наманган шаҳри таркибида Янги Наманган тумани ташкил этилгани маълум қилинган эди.