Тошкентда Иккинчи жаҳон уруши қатнашчиси бўлган 101 ёшли эркак коронавирусдан соғайди. Бу ҳақда Соғлиқни сақлаш вазирлиги ахборот хизмати хабар берди.

Хабарга кўра, 2021 йил 20 апрель куни Зангиота 2-сон юқумли касалликлар шифохонасига 101 ёшли оққўрғонлик уруш ва меҳнат фахрийси Ф.Н. оғир аҳволда олиб келинган. Яқинлари билан ўтказилган суҳбатда беморда сўнгги 4 кун давомида йўтал, тана, оёқ-қўлларнинг қақшаб оғриши, тана ҳароратининг фебрил даражагача ошиши, чарчоқ, ҳолсизлик, нафас олишнинг қийинлашуви, ҳансираш, юрак уришининг тезлашиши, иштаҳасизлик касаллик белгилари кузатилгани аниқланган. Ўтказилган ПЗР тести натижалари мусбат чиққан, рентген текширувларида ўпканинг сурункали обструктив бронхоэктатик касаллиги ва пневмосклероз ҳамда ўнг томонлама зотилжам мавжудлиги таъкидланган.

Маълум қилинишича, уйда беморнинг аҳволи оғирлашгани сабаб Зангиота 2-сон юқумли касалликлар шифохонасига мурожаат қилинган. Бемор МСКТ текширувидан ўтказилганда ўпка тўқимасининг зарарланиши билан икки томонлама вирус этиологияли интерстициал зотилжам ташхиси қўйилиб, беморда коронавирус инфекцияси билан зарарланиш борлиги тасдиқланган.

Нуронийга тезда биринчи ёрдам кўрсатилган. Белгиланган халқаро стандартлар бўйича текширув ва даво муолажалари бошланган ва унинг аҳволи яхшиланиб борган. Даво муолажаларини мустаҳкамлаш мақсадида инфекционист, пульмонолог, кардиолог, невролог каби соҳа мутахассислари жалб қилинган. Касалликка қарши тўғри даво муолажалари сабаб 101 ёшли бемор коронавирусдан буткул соғайиб, уйига рухсат берилган.

Аввалроқ Ўзбекистонда боғча, мактаб ходимлари ва сурункали касаллиги бор фуқароларни коронавирусга қарши эмлаш бошлангани, шунингдек, эмлашдан сўнг тана ҳарорати кўтарилганда нима қилиш кераклиги ҳақида хабар қилинган.