Бухоро вилоятида жиззахлик аёл икки йил аввал танишган йигитидан ўртадаги ишқий муносабатларни сир сақлаш, унинг оила аъзоларига айтмаслик учун пул талаб қилди. Бу ҳақда Олий суд хабар берди.

Хабарга кўра, жиззахлик Г.С. икки йил муқаддам бухоролик А.Р. билан яширинча ишқий муносабатларга киришган. У оиласидан ажрашгач, А.Р.нинг таклифига биноан Бухоро шаҳридаги ижара уйида яшай бошлаган. Оилали А.Р. унга кўп миқдорда пул бериб тургани таъкидланган.

Қайд этилишича, у эркакка ишқий муноасбатлар чоғида касаллик орттирганини маълум қилиб, уни даволаш учун катта миқдорда пул сўраган. Аммо А.Р. бунча пулни беролмаслигини айтгач, орадаги сирни унинг оила аъзоларига ошкор этиши билан таҳдид қилган. Шундан сўнг эркак ҳуқуқни муҳофаза қилувчи идорага аёлнинг товламачилиги юзасидан ариза ёзган. Шунга асосан Г.С. ундан 3 миллион сўмни олаётганда қўлга олинган.

Маълум қилинишича, суд аёлни Жиноят кодексининг 165-моддаси 1-қисми билан айбли деб топган ва 3 йил муддатга озодликни чеклаш жазосини тайинланган.

Аввалроқ Наманганда шахсий ёзишмаларини тарқатиб юбормаслик учун йигитдан 1000 доллар талаб қилган қиз ушлангани ва Наманганда танишини кийимсиз ҳолда видеога олиб, тарқатиб юбормаслик учун 20 миллион сўм сўраган эркаклар қўлга олингани хабар қилинган эди. Шунингдек, Жиззахда эр Telegram’даги ёзишмалари сабаб хотинини пичоқлаб ўлдиргани маълум қилинган.