Президентнинг «Боксни янада ривожлантириш чора-тадбирлари тўғрисида»ги қарорига кўра, республикада бокс бўйича олий спорт мактаблари ташкил этилади. Бу ҳақда Адлия вазирлиги ахборот хизмати хабар берди.

Қарорда белгиланишича, дастлаб қуйидаги ҳудудларда Туризм ва спорт вазирлиги ҳузурида бокс бўйича олий спорт маҳорат мактаблари давлат муассасаси сифатида ташкил этилади:

• Андижон вилояти (Андижон, Наманган ва Фарғона вилоятлари);
• Бухоро вилояти (Қорақалпоғистон Республикаси, Бухоро, Навоий ва Хоразм вилоятлари);
• Қашқадарё вилояти (Жиззах, Қашқадарё, Самарқанд ва Сурхондарё вилоятлари);
• Тошкент вилояти (Сирдарё ва Тошкент вилоятлари, Тошкент шаҳри).

Таъкидланшича, бокс мактаблари фаолияти ёш спортчиларни танлаб олиш ва уларни асосан миллий терма жамоаларга тайёрлашга йўналтирилиб, ўқиш 7-синфдан ташкил этилади, таълим олиш муддати 5 йил этиб белгиланади.

Шунингдек, қарор билан боксни 2025 йилгача ривожлантириш концепцияси тасдиқланган. Унга кўра, 2025 йилгача қуйидалигиларни амалга ошириш белгиланган:

• спорт таълим муассасаларидаги бокс билан мунтазам шуғулланадиган ўқувчилар сонини 27 минггача етказиш;
• келгуси 5 йил ичида давлат-хусусий шериклик шартлари асосида 7 та бокс залларини ташкил этиш;
• бокс бўйича терма жамоаларнинг 46 га яқин халқаро спорт мусобақаларида иштирокини таъминлаш.

Таъкидланишича, 2021/2022 ўқув йилидан Ўзбекистон давлат жисмоний тарбия ва спорт университети, ихтисослаштирилган олимпия захиралари мактаб-интернатлари, ихтисослаштирилган болалар-ўсмирлар спорт мактаблари ва болалар-ўсмирлар спорт мактабларида бокс бўйича амалдаги ўқишга қабул қилишнинг давлат буюртмаси параметрлари икки бараварга оширилади.

Аввалроқ Президент «Боксни янада ривожлантириш чора-тадбирлари тўғрисида»ги қарорни имзолагани, шунингдек, ўзбекистонлик боксчилар ёшлар ўртасидаги жаҳон чемпионатида 10 та медални қўлга киритгани хабар қилинган.