АОКАда 1 май, шанба куни «Ўзтемирйўлназорат» инспекцияси ахборот хизмати раҳбари Фирдавс Хайриддинов иштирокидаги брифингда 2021 йил 1-чоракда темир йўл транспортида ҳаракатланиш хавфсизлиги бузилишларининг умумий сони 2020 йилнинг шу даврига нисбатан ошгани ҳақида ахборот берилди. Бу ҳақда «Bugun.uz» мухбири хабар берди.

Таъкидланишича, темир йўл транспортида ҳаракатланиш хавфсизлиги бузилишлари кўрсаткичи 2021 йил 1-чорагида 26 та ҳолатни ташкил этган. Айнан 2020 йилнинг шу даврига нисбатан 13 та ҳолат қайд этилгани аниқланган. Шундан «Ўзбекистон темир йўллари» АЖга қарашли темир йўлларда поездлар ҳаракат хавфсизлиги бузилиши бўйича 13 та ҳолатга йўл қўйилган. Шунингдек, бу кўрсаткич 2020 йилнинг 1-чорагида 10 та ҳолатни ташкил этган.

Фирдавс Хайриддиновнинг сўзларига кўра, саноат корхоналари шохобча йўлларида 2021 йилнинг 3 ойи давомида 13 та темир йўл ташишлари хавфсизлиги бузилишларига йўл қўйилган. 2020 йилнинг шу даврида бу кўрсаткич 3 та ҳолатни ташкил қилган (яъни 3 баробарга кўпайган).

«Ўзбекистон темир йўллари», вазирлик ва идораларга қарашли темир йўлларда йўл қўйилган темир йўл ташишлари хавфсизлиги бузилишлари таҳлил қилинганда, асосан, 16 ҳолатда – ҳаракатдаги таркиб ва техник воситаларнинг техник носозликлари аниқланган. Шу билан бирга, 9 ҳолат эса – «инсон омили»нинг салбий таъсири сабабли юзага келгани маълум бўлган.

Эслатиб ўтамиз, аввалроқ Тожикистон ва Ўзбекистон ўртасида янги темир йўл қурилиши ҳамда Ўзбекистон бўйлаб янги авиа ҳамда темир йўл қатновлари йўлга қўйилгани ҳақида хабар берилган. Шунингдек, «Тошкент метрополитени» «Ўзбекистон темир йўллари» тузилмасидан чиқарилгани маълум қилинганди.