Қозоғистонда ўзбекистонлик аёл қулликда ушлангани ва 12 ёшидан номусига тегилгани маълум бўлди — видео
Олмаоталик йигит ўзбекистонлик аёлни 12 ёшлигидан номусига тегиб, калтаклагани маълум бўлди. Бу ҳақда «Astana» телеканали хабар берди.
Хабар қилинишича, Рада 11 ёшида онаси ва бувиси билан Тошкентдан Олмаотага кўчиб келади. Қизнинг онаси уларни ҳеч нарсасиз қолдириб ташлаб кетади. Шу пайт 24 ёшли Олмаота фуқароси «ёрдам» таклиф қилиб, қизга бозорда савдо қилишида кўмаклашади ва кейин қизнинг номусига тегишни бошлайди.
Раданинг сўзларига кўра, Олмаота фуқаросининг ота-онаси бу ҳолатни билиб, бунга аҳамият бермаган. Йигит ҳар куни қизнинг номусига тегиб, қаршилик кўрсатганида уни урган. Қиз қочмоқчи бўлганида, тутиб калтаклаган. Рада 14 ёшида ундан қиз, 16 ёшида эса ўғил кўради. Бироқ ўғли 3 ойлигида вафот этади.
«Унинг онаси полицияга боланинг отаси кимлигини айтмасликни илтимос қилди. Мени депортация қилишлари, фарзандимни эса болалар уйига беришларини айтиб таҳдид қилди. Шу сабабли бола шифокорлар кўригидан ўтмади, полиция ходимлари ҳам келмади. Бола вафот этганида ўзлари ювиб кўмишган», — дея маълум қилган жабрланувчи.
Қиз 18 ёшидагина қулликдан қочолган. Ҳозирда у қизи билан «автомойка»да яшаб, ҳам ишлайди. Унга нисбатан зўравонликда гумон қилинган шахс ҳибсга олинган. Бироқ унинг ота-онаси ҳеч қандай жавобгарликни ўз зиммасига олмаган.
«НеМолчитеДети.kz» жамоат фонди директори қиз йигитнинг онасига шикоят қилганида у қизга жим туришини айтгани, қизнинг бувиси бу ҳақда эшитиб, жанжал бошланганини айтган. Шунингдек, йигитнинг отаси жанжалга аралашиб, агар кимдир кимгадир шикоят қилса, уларни бўлакларга бўлиб, кучукларга ем қилишини, ҳеч ким уларни изламаслиги, агар полиция улар ҳақида билса, чет элда ноқонуний бўлганлиги учун қамоққа тушишларини айтган.
Ҳозирда ҳолат юзасидан прокуратура ва полиция ҳодимлари тергов ишлари олиб бормоқда. Агар йигитнинг айби исботланса, унга 5 йил муддатга озодликдан маҳрум қилиш жазоси тайинланиши мумкин. Рада йигитнинг ота-онасига ҳам чора кўрилишини сўраган.
Аввалроқ Россияда 13 ёшли боланинг номусига теккан ўзбекистонлик эркак қўлга олингани ҳақида хабар берилганди. Шунингдек, Россияда номаълум шахс ўзбекистонлик ҳомиладор аёлни пичоқлаб кетгани маълум қилинган.
