Самарқанд вилояти Пайариқ туманида яшовчи бир неча одамларнинг уйига бостириб кириб, тунаган 5 нафар шахс қўлга олинди. Бу ҳақда вилоят Ички ишлар бошқармаси ахборот хизмати хабар берди.

Маълум қилинишича, 2020 йил 20 июнь куни соат 17:00 атрофида Дўстлик туманида 39 ёшли эркак тўрт нафар шериги билан одамларнинг уйларига кириб мол-мулкини тунашни режалаштиради. Бунинг учун улар ҳуқуқ-тартибот ходимларининг хизмт кийимларини кийиб, пневматик тўппонча ва кўзни ёшлантирувчи махсус воситаси билан қуролланган ҳолда Самарқанд вилояти Пайариқ туманида яшовчи ўзларига таниш бир нечта оилаларнинг уйларига босқинчилик йўли билан тушган.

Хусусан, тунги 01:00 атрофида биринчи уйдан 55 миллион сўм, 300 АҚШ доллари ҳамда уй эгасининг фуқаролик паспортини талон-торож қилган. Шундан сўнг соат 02:00 атрофида гуруҳ иккинчи уйга кириб, хонадон эгасининг «Lacetti»сини олиб қочган. Улар машинани олиб қочиб, Жиззах вилоятининг Ғаллаорол тумани Мингбулоқ қишлоғида қолдирган ва воқеа жойидан яширинган.

Бундан ташқари, улар худди шу усулда яна бир уйга кирган. У ерда қонунга хилоф равишда тош тегирмон ёрдамида олтин рудаси ажратиб олинаётгани тегишли тартибда расмийлаштирмаслик эвазига 5 минг АҚШ доллар талаб қилган. Уй эгаси фаол қаршилик кўрсатган.

Мазкур жиноятларни содир этган беш нафар эркак ички ишлар органлари ходимлари томонидан қўлга олинган.

Аввалроқ Бухорода тадбиркорнинг уйига бостириб кириб, пулларини ўғирламоқчи бўлган гуруҳ ушлангани ва Фарғонада 2 қуролланган эркак дорихоналарга бостириб киргани хабар қилинган эди. Шунингдек, Қашқадарёда уйга бостириб кириб, пул ва тилла тақинчоқларни ўғирлаган 3 номаълум шахс ушлангани маълум қилинган.