Россия Либерал-демократик партияси раҳбари Владимир Жириновский президент лавозимини қайта номлашни таклиф қилди. Ушбу ҳақда «Ura.ru»га берган интервьюсида маълум қилди.

Келтирилишича, сиёсатчи «президент» сўзи инглиз тилидан ўзлашган сўз эканини таъкидлаб, қайта номлашни таклиф қилган. «Англия ва АҚШда болалар русларда ҳатто бошқарув лавозими учун русча сўз ҳам йўқ деб, устимиздан кулади», — дея таклифини изоҳлаган Жириновский.

Шунингдек, у Россия давлат раҳбарини «олий ҳукмдор» деб аташ кераклиги, бироқ «қирол» ва «монарх» варианти аллақачон эскирганини таъкидлаган. Шу билан бирга, сиёсатчи инқилобгача бўлган терминларни мамлакат маъмурий тақсимотида ўзлаштирма сўз ва бюрократиядан халос бўлишда қўллаш кераклигини айтган.

Аввалроқ Путин ва Байден учрашувида қайси мавзу муҳокама қилиниши айтилгани ҳақида хабар берилганди. Шунингдек, Франция президенти ва Путин Украинадаги вазиятни муҳокама қилгани маълум қилинган.