Кабадаги Қора тошнинг юқори аниқликдаги фотосуратлари эълон қилинди. Бу ҳақда Саудия Арабистони ҳукуматига таяниб, «CNN» хабар берди.

Келтирилишича, Қора тошни 49 000 мегапикселгача суратга олишда 50 соатдан кўпроқ вақт кетган. Фотожараёнда умумий 160 гигабайтли бўлган 1050 та фотосурат олинган.

Оксфорд университетининг исломшунослик бўйича ҳамкори Афифи ал-Акити тошнинг ранги қора эмаслиги, буни тошнинг катталаштирилган рақамли фотосуратидан кўриш мумкинлигини айтган.

«Тош аслида қора эмас, балки оқ рангда бўлган. У одамларнинг тошга тегиб Худодан кечирим сўраши сабабли қора тусга кирган, яъни тош инсониятнинг гуноҳларини акс эттиришига сабаб бўлган», — дея таъкидлаган Афифи ал-Акити мусулмон манбаларига таяниб.

Аввалроқ Саудия Арабистонида Ҳаж ишлари вазири ўзгаргани ҳақида хабар берилганди.