Тошкент шаҳрида 23 апрель куни 92 ёшли аёл қизи ва набираси томонидан калтаклангани хабар қилинганди. Маҳалла ва оилани қўллаб-қувватлаш вазирлиги ҳолат юзасидан муносабат билдирди.

Хабарга кўра, мазкур хабар юзасидан олиб борилган ўрганишлар давомида воқеа Тошкент шаҳар Мирзо Улуғбек тумани Янги Aвайхон маҳалла фуқаролар йиғини Қорасув-6 даҳаси 8-уй 4-хонадонда доимий рўйхатда турувчи, 1934 йилда туғилган фуқаро Г.Т. билан содир бўлгани аниқланди. Фуқаро Г.Т. сўнгги йилларда набираси, 1989 йилда туғилган фуқаро С.Г.ga тегишли, Мирзо Улуғбек тумани Минглола маҳалласида жойлашган 9-хонадонда яшаб келган. Шу сабабли набираси С.Г. ҳамда унинг онаси, фуқаро Г.Т.нинг қизи, 1964 йилда туғилган фуқаро С.Г.лар кекса аёл билан уй-жой масаласида доимий жанжаллашиб келган.

Қайд этилишича, 23 апрел куни навбатдаги жанжал вақтида она ва бола кекса аёлга жиддий жароҳат етказган. Фуқаро Г.Т.нинг яна бир набираси, 1983 йилда туғилган Д.Г. жорий йилнинг 26 апрел куни бувисини касалхонага олиб борган. Aйни вақтда мазкур ҳолат бўйича Мирзо Улуғбек тумани Ички ишлар органлари фаолиятини мувофиқлаштириш бошқармаси тергов бўлими томонидан Жиноят кодексининг 110-моддаси 2-қисми «в» банди билан жиноят иши қўзғатилган.

Таъкидланишича, Минглола маҳалла фуқаролар йиғини томонидан фуқаро унинг ҳолидан доимий хабар олиб турилган ҳамда унга мунтазам равишда моддий ва ижтимоий ёрдамлар кўрсатилган.