«Lancet» тиббиёт журналида Исроил соғлиқни сақлаш вазирлигининг коронавирусга қарши эмлаш самарадорлиги бўйича миллий статистика натижалари эълон қилинди. Бу ҳақда «NEWS» нашри хабар берди.

Келтирилишича, вакцина тўғрисидаги маълумотлар ёш гуруҳи, жинси, шунингдек, эмлашдан кейин ўтган вақт бўйича берилган. Унда коронавирусга қарши «Pfizer» вакцинасининг икки дозаси коронавируснинг оғир шаклидан ва унинг асоратларидан ўлиш хавфини 95 фоизга камайтиргани айтилган. Вакцинанинг биринчи дозаси билан эмлашда инфекция 58 фоиз, оғир касаллик хавфи 76 фоиз ва ўлиш эҳтимоли 77 фоиз камайган.

Шунингдек, вакцинанинг 85 ёшдан ошганларда, яъни оғир касалланиш хавфи юқори бўлган ёш гуруҳида самарадорлиги қайд этилган. Ушбу ёш гуруҳида инфекциянинг 94,1 фоизга, касалхонага ётқизилишнинг 96,9 фоиз ва коронавирус туфайли келиб чиққан асоратлардан ўлимнинг 98,1 фоиз камайиши қайд этилган.

Аввалроқ Исроилда коронавируснинг янги штамми аниқлангани ҳақида хабар берилганди. Шунингдек, мамлакатда пандемиядан кейин ўтказилган илк диний маросимда одамлар тиқилинч бўлган трибуна қулаб тушгани маълум қилинган.