Тошкент ерусти метросининг Қўйлиқ бозори яқинидаги 7-бекатида чироқ ўчиб қолди. Бу ҳақда «Kun.uz» хабар қилди.

Қайд этилишича, Тошкент ерусти метросининг Қўйлиқ бозори яқинидаги 7-бекатига келган йўловчилар қоронғиликдан телефонларининг чироғини ёқиб кўчага чиқишига тўғри келган.

Воқеа гувоҳларининг маълум қилишича, 7 май куни соат 22:00 дан сўнг шу атрофдаги мавзеда чироқ ўчгани сабаб бекат ҳам қоронғиликда қолган. Машинист бекатда йўловчиларни туширишдан олдин бу ҳақда 2 марта огоҳлантирган.

Эслатиб ўтамиз, Тошкент метрополитенининг «Новза» бекатида 28 апрель куни электропоезд тўхтаб қолгани хабар қилинганди. Чилонзор йўналишидаги поездлар чекланган режимида ҳаракатланган. Шу куннинг ўзида барча носозликлар бартараф этилган ва барча поездлар белгиланган ҳаракат жадвалига мувофиқ ҳаракатлана бошлаган. Кейинчалик Антимонополия қўмитаси ҳолатни назоратга олган.

Шундан сўнг, 18 март куни метронинг ерусти Сергели йўналиши бошланиш жойида икки поезд тўқнашиб кетганди. Тўхтаб қолган таркибга ортидан келган бошқа бир таркиб келиб урилган.

Шунингдек, 7 апрель куни «Ғафур Ғулом» бекатида поезд техник сабабларга кўра тўхтаб қолди, оқибатда йўловчилар бошқа таркибга кўчирилди, юрмай қолган поездни бошқа бир поезд шатакка олишига тўғри келганди. Кейинчалик 8 апрель куни Сергели йўналишида метро ерусти йўлида тўхтаб қолди. Контакт рельсининг кронштейнлари чиқиб кетди, бунинг оқибатида вагонлардаги йўловчилар ерусти метроси бўйлаб пиёда ҳаракатланди.

Бундан ташқари, 9 апрель куни метрополитеннинг Чилонзор йўналишидаги «Пушкин» ва «Буюк ипак йўли» бекатлари оралиғида метро вагони эшигини ёпмай ҳаракатланган эди. Бунинг оқибатида хизмат вазифаларини нотўғри бажаргани учун машинист, электромонтёр-чилангар ва электр ҳаракатланувчи таркибнинг катта устаси эгаллаб турган лавозимидан озод этилган эди.

Шу билан бирга, Тошкент метрополитенининг «Буюк ипак йўли» бекатида 6 май куни поезд йўлда сигнал чалиб тургани ҳақида тарқалган хабарларга изоҳ берилган.