Хитой 2019 йилда Ер атмосферасига дунёнинг барча ривожланган мамлакатлари қўшиб ҳисоблангандан ҳам кўра кўпроқ иссиқхона газларини чиқарган. Бу ҳақда «The Washington Post» хабар берди.

Маълум қилинишича, мамлакат 1990 йиллардан буён чиқиндилар миқдорини уч бараварга оширган ва 2019 йилда биринчи маротаба 14,1 гигатонналик чегарадан ўтган.

Қайд этилишича, мутахассислар жараёнда дунёнинг 190 мамлакатидан тўпланган маълумотларни ўрганган. Таҳлил давомида олтита иссиқхона газлари — карбонат ангидрид, метан, азот оксиди, гидрофлорокарбонатлар, перфлуорокарбонлар ва олтингугурт гексафлориди даражаси кўриб чиқилган.

Маълумотларга кўра, сўнгги ўн йил ичида глобал чиқиндилар миқдори атмосферада 11,4 фоизга ўсган. Хитой эса умумий миқдорнинг 27 фоизини ташкил этган. Иккинчи энг ёмон кўрсаткич АҚШга тўғри келган. Ушбу мамлакатда иссиқхона газлари 11 фоизни кўрсатган. Учинчи ўринни 6,6 фоизли натижа билан биринчи марта Европа Иттифоқини четлаб ўтиб, Ҳиндистон эгаллаган.

Аввалроқ карантин сабаб атмосферага ташланаётган карбонат ангидрид рекорд даражада камайгани маълум қилинган. Шунингдек, карбонат ангидрид газини тўплаш ва уни қайта ишлаш соҳаси катта бизнесга айланиши мумкинлиги ҳақида хабар берилганди.