Ўзбекистон Ҳиндистон ва Туркияга авиақатновлар учун вақтинчалик чекловлар ўрнатди. Бу ҳақда Соғлиқни сақлаш вазирлиги ахборот хизмати хабар берди.

Тегишли ташликотлар таклифини инобатга олган ҳолда мамлакатда коронавирус инфекцияси тарқалишини жиловлаш, унга қарши курашиш бўйича олиб борилаётган ишларни мувофиқлаштириш ҳамда ушбу инфекциянинг янги штаммларини мамлакатга кириб келишининг олдини олиш мақсадида Республика махсус комиссияси қарори билан касалланиш кўрсаткичи юқори бўлган айрим давлатлар билан ўзаро авиақатновларга қуйидаги вақтинчалик чекловлар жорий қилинди:

• Истанбул шаҳридан Фарғона, Урганч ва Самарқанд шаҳарларига авиақатновларни 2021 йил 5 майдан 1 июнга қадар тўхтатиш;
• Ҳиндистон ва Туркияга сайёҳлар учун мўлжалланган барча чартер қатновларни 10 майдан бошлаб эпидемиологик вазият барқарорлашгунга қадар тўхтатиш;
• Тошкент–Истанбул йўналишида авиақатновларни вазиятдан келиб чиқиб, 10 майдан бошлаб паритет асосида (талабдан келиб чиқиб) камайтиришга қарор қилинди.

Аввалроқ Ўзбекистон ва Туркия ўртасидаги айрим авиақатновлар бекор қилинганди.