АОКАда 8 май, шанба куни «Ўзстандарт» агентлиги ахборот хизмати раҳбари Абдурауф Расулов иштирокида бўлиб ўтган брифингда Ўзбекистонда қурилиш объектларида сифатсиз туника листлар ишлатилгани маълум қилинди. Бу ҳақда «Bugun.uz» мухбири хабар берди.

Маълум қилинишича, «Ўзстандарт» агентлиги ҳузуридаги департамент томонидан Навоий ва Қашқадарё вилоятлари қурилиш объектларида ишлатилаётган томлар учун туника листларнинг сифати ўрганилган. Синовлар натижасида Россиядан келтирилган 3 турдаги намуналарнинг қалинлик кўрсаткичлари амалдаги туника листларникидан сифатсиз экани аниқланган.

Абдурауф Расуловнинг сўзларига кўра, Хитойдан келтирилган 1 турдаги рухли қоплама қалинлиги ҳам текширилганда амалдаги техник регламент ва стандарт талабларига жавоб бермаслиги қайд этилган.

Шунингдек, у «Qarshi city» қурилиш объектида ишлатилаётган Эрондан келтирилган арматура маҳсулотининг сифати текширилганда унинг узилишга қаршилик кўрсаткичи белгиланган стандартдан паст экани аниқланганини келтириб ўтган.

Аввалроқ Ўзбекистонда қурилиш объектларида бюджетга 19,6 миллиард сўм зарар етказилгани ва Ўзбекистонда қанча объектнинг қурилиш-монтаж ишлари назорат қилинаётгани хабар қилинганди.