Президент Иккинчи жаҳон уруши иштирокчилари ҳақидаги маълумотларнинг электрон базасини яратиш бўйича топшириқ берди
Шавкат Мирзиёев «Ғалаба боғи» ёдгорлик мажмуасида ўтказилган 9 май — Хотира ва қадрлаш кунига бағишланган тадбирда сўзлаган нутқида Вазирлар Маҳкамасига Иккинчи жаҳон уруши иштирокчилари ҳақидаги маълумотларнинг электрон базасини яратиш бўйича топшириқ берди.
Тадбирда давлат раҳбари уруш қатнашчилари ҳақида маълумот йиғиш ва уларни тарғиб этиш, шунингдек, бу борада миллий тарихни ўрганаётган ёшлардан ташаббуслар кутилаётганини таъкидлаган:
«Иккинчи жаҳон уруши тўғрисидаги ҳар бир ҳақиқатни аниқлаш ва халқимизга етказиш, аждодлар хотирасини абадийлаштириш бўйича кўп иш қилишимиз керак. Мана шундай материалларни ва ҳужжатларни тўплашимиз, тарғиб этишимиз жуда зарур ва бунга жавобгармиз. Бугунга келиб, биз билмаган маълумотлар, фактлар борлига такрор-такрор гувоҳ бўлдик. Бу борада замонавий илм-фанларни, хусусан, миллий тарихимизни ўрганаётган ёшларимиздан катта ташаббусларни кутиб қоламиз», — деган Президент.
Шунингдек, Шавкат Мирзиёев уруш қатнашчилари маълумотлари жамланган электрон база яратишда хориж давлатларининг тажрибасидан фойдаланиш бўйича кўрсатма бериб, Вазирлар Маҳкамасига бу ҳақда алоҳида қарор лойиҳасини тайёрлашни топширди:
«Бугунги кунда юртимизда уруш қатнашчиларининг тўлиқ электрон базасини яратишнинг вақти келди. Россия, Беларусь, Қозоғистон каби давлатларнинг бу борадаги ижобий тажрибасини ўрганиб, бундай амалий ишларни Ўзбекистонда ҳам ташкил этиш лозим. Шу муносабат билан Вазирлар Маҳкамасига икки ҳафта муддатда Иккинчи жаҳон уруш қатнашчилари ҳақидаги маълумотларнинг электрон базасини яратиш, бу борада махсус сайтлар, интернет ресурсларини кўпайтириш ҳақида алоҳида қарор лойиҳасини тайёрлаб, киритиши топширилади», — деган давлат раҳбари.
Мавзуга доир:
Аввалроқ Тошкент кўчаларида ўтказилган ретро автомобиллар марши суратлари тақдим этилган эди.
