Антимонополия қўмитаси пахта ёғи нархларининг кескин ошгани сабабини маълум қилди
Монополияга қарши курашиш қўмитаси томонидан пахта ёғи нархларининг кескин ошгани юзасидан ўрганиш олиб борилди.
Маълум қилинишича, ўрганиш натижаларига кўра, 2021 йил апрель ойи давомида биржа савдоларига 40 та пахта-тўқимачилик кластерлари томонидан техник чигит савдоларга қўйилгани ҳамда қўйилаётган техник чигитнинг бошланғич нархлари апрель ойида ўртача 38 фоизга кўтарилгани аниқланган.
Ўсимлик ёғи нархининг ошганидан фойдаланган айрим пахта-тўқимачилик ишлаб чиқариш ташкилотлари пахта чигити нархини ҳам асоссиз оширишган. Бу эса пахта ёғининг нархига ҳам таъсирини кўрсатган.
Биржа савдоларида техник чигитнинг бошланғич нархларини келишиб сунъий ошириш ва рақобат тўғрисидаги қонунчилик талаблари бузилиши аломатлари юзасидан 34 та пахта-тўқимачилик кластерларига нисбатан иш қўзғатилган.
Мавзуга доир: Ўзбекистоннинг 9 та вилоятида ўсимлик ёғи нархи пасайди
Аввалроқ Ўзбекистон бозорларида пахта ёғи нархи нима сабабдан ошганига изоҳ берилган эди. Шунингдек, Антимонополия қўмитаси пахта ёғи нархининг ошишини тўхтатиш учун биржага чеклов киритгани маълум қилинган.
