АҚШ ҳукумати 9 май, якшанба куни мамлакатдаги энг катта бензин етказувчи компанияга қилинган киберҳужум сабаб фавқулодда ҳолат эълон қилди. Бу ҳақда«BBC» хабар берди.

Келтирилишича, хакерлар 7 май куни «Colonial Pipiline» бензин етказувчи компания тизимига «Darkside» (маълумотларни шифрлаш ва ўғирлаш учун ишлатиладиган дастурий таъминотни ишлаб чиқарувчи гуруҳ) шифрловчи вирусини киритган. Ҳозирда компаниянинг маълумотлар базаси хавф остида экани айтилган.

«Colonial Pipiline» ҳужумнинг сабаби ва ҳажмини ўрганиш учун киберхавфсизлик компаниясини ёллаган ва бу ҳақда ҳуқуқни муҳофаза қилиш органлари ва федерал идораларга хабар қилган.

Ҳозирда компаниянинг иш қобилиятини тиклаш ишлари олиб борилмоқда. Фавқулодда ҳолат 18 штатда жорий қилинган. Бу ёнилғи ташишдаги чекловларни олиб ташлайди ва нефть маҳсулотларини танкерлар томонидан етказиб беришга имкон беради.

«NBC News» хабарига кўра, «Colonial Pipeline»га ҳужум Россиянинг «Darkside» жиноий гуруҳи томонидан амалга оширилган бўлиши мумкин.

Маълумот ўрнида, «Colonial Pipeline» АҚШнинг энг йирик бензин етказувчи қувури бўлиб, Форс кўрфази соҳилидаги заводлардан мамлакатнинг Шарқий қирғоғига ёнилғи етказиб беради. Қувур линияси ҳар куни Шарқий соҳилда истеъмол қилинадиган ёнилғининг тахминан 45 фоизини ташийди.

Аввалроқ Microsoft дастурий таъминотида кузатилаётган заифлик глобал киберхавфсизлик инқирозига айланиши мумкинлиги ҳақида хабар берилганди. Шунингдек, Facebook’нинг 500 миллиондан ортиқ фойдаланувчиси ҳақидаги маълумотлар интернетда тарқалиб кетгани маълум қилинган.