Алишер Навоий ҳайкали олдида ноўрин ҳаракатлар содир этган йигит қамалди
Самарқанд вилоятида Алишер Навоий ҳайкали олдида ноўрин хатти-ҳаракатлар содир қилган йигитга нисбатан суд ҳукми ўқилди. Бу ҳақда вилоят Ички ишлар бошқармаси хабар берди.
Хабарга кўра, ҳайкал олдида ноўрин хатти-ҳаракатлар содир қилган каттақўрғонлик йигитларга нисбатан 15 сутка маъмурий қамоқ жазоси тайинланган.
Эслатиб ўтамиз, 10 май куни ижтимоий тармоқларда тарқалган видеода Алишер Навоий ҳайкали олдида ноўрин хатти-ҳаракатлар содир қилган каттақўрғонлик йигит халқдан кечирим сўрагани маълум қилинган.
«Мен Самарқанд вилояти Каттақўрғон шаҳрида 1997 йилда тўғилганман. 10 май куни ижтимоий тармоқларда Алшер Навоий сиймосини масхара қилиб видео тарқатдим. Бу ишимдан пушаймонман. Мен бу видеони бунчалик даражага олиб келишини билмагандим. Мен жудаям катта хато қилибман. Ўзбекистон юзини ерга қаратибман. Ҳаммадан чин юракдан кечирим сўрайман. Қилган ишимдан пушаймонман», — дея таъкидлаган йигит.
Аввалроқ Самарқандда икки йигит обуначи йиғиш мақсадида ўзини томдан ташлагани хабар қилинган эди. Шунингдек, Фарғонада автомобиль ойнасига чиқиб, TikTok’ка видео олган йигит ушлангани маълум қилинган.
