«Ўлар ҳолатимда ҳам қабул қилишмади». Тошкентда ҳомиладор аёл туғуруқхонага қабул қилинмади — видео
Тошкент шаҳри Сергели туманида 29 апрель куни туман туғуруқхонасига келган ҳомиладор аёл қабул қилинмади. Бу ҳақда «Bu Kun» дастурида хабар берилди.
Хабарга кўра, ҳолат 29 апрель куни соат 3:00 да содир бўлган. Туғуруқхона бош шифокори бунга бефарқ бўлган тиббиёт ходимининг айби борлигини тан олган. Маълум қилинишича, навбатчи қисмга 2000 йилда туғилган аёл С.О. мурожаат қилган. Навбатчи шифокор М.М. туғуруқ йўлларини кўриб, туғуруқ энди бошланиш жараёнида бўлгани учун ва аёлнинг ўзи Самарқанд вилоятида рўйхатда тургани учун унга рад жавобини берган.
Шунингдек, аёлнинг таъкидлашича, шифокорлар уни қабул қилмаган. У қайнанаси, турмуш ўртоғи билан ташқарида қолиб кетган.
«Биз олмаймиз, ҳали вақти бор экан деди. Шифокор аёл энсасини қотириб чиқмади. Қайнанам, мен, турмуш ўртоғим қолиб кетдик. Улар тез ёрдам келгандан кейин чиқди. Ўлар ҳолатимда ҳам қабул қилишмади», — дейди аёл.
Қайд этилишича, туман туғуруқхонасига қабул қилинмаган аёл ўша куни тез ёрдам машинасида Тошкент тиббиёт академиясига олиб борилган ва туғуруқ бўлимида ўғил фарзандли бўлган. Бу ҳолат бўйича хизмат текшируви ўтказилинади, аниқланган камчиликлар бўйича қатъий чора кўрилади.
Мавзуга доир:
Аввалроқ Жиззахда ҳомиладор аёлнинг ўлимига сабабчи бўлган 70 ёшли шифокорга суд ҳукми ўқилгани хабар қилинган эди.
