АОКАда 11 май, сешанба куни «Ўзсаноатқурилишматериаллари» уюшмаси бошқарма бошлиғи Ботир Хўжабеков иштирокида бўлиб ўтган брифингда бозорларда қурилиш материалларининг нархи қандай экани маълум қилинди. Бу ҳақда «Bugun.uz» мухбири хабар берди.

Бошқарма бошлиғининг маълум қилишича, республикада цемент ишлаб чиқаришга ихтисослашган 30 та корхона фаолият кўрсатади. Ўтган ҳафта давомида биржа савдоларига ўртача кунлик 51,7 минг тоннадан цемент қўйилган ва бир тоннаси ўртача 569 минг сўмга сотилган.

Таъкидланишича, газобетон ишлаб чиқариш бўйича мамлакатда жами йиллик қуввати 1,71 миллион куб метр бўлган 9 та корхона бўлиб, ҳозирда бир метр куб газобетоннинг ўртача бозор нархи 700 минг сўм экани қайд этилган.

«Ҳозирда иссиқлик сақловчи материаллар ишлаб чиқариш бўйича жами йиллик қуввати 115 минг тонна бўлган 10 та корхона бор. Уларнинг ўртача бозор нархи 800–900 минг ҳисобланади», — дейди Ботир Хўжабеков.

Шунингдек, у 40 та корхона керамик плиталар ишлаб чиқараётганини ҳамда унинг бир метр квадратининг ўртача бозор нархи 35 минг сўмни ташкил этишини таъкидлаган. Бундан ташқари, қурилишда энг кўп ишлатиладиган материаллардан бири гипсокартон тайёрлашга ихтисослашган корхоналар сони 36 та бўлиб, уларнинг йиллик қуввати 77,8 метр квадратни ташкил этади. Хусусан, гипсокартоннинг бозордаги ўртача нархи 38 минг сўм экани айтилган.

Шу билан бирга, санитар-техник буюмларнинг бозордаги ўртача нархи 350 минг сўмни ташкил этган.

Аввалроқ Ўзбекистоннинг айрим ҳудудларидаги қурилиш объектларида сифатсиз туника листлар ишлатилаётгани аниқлангани ҳақида хабар берилганди.