Андижон шаҳри Бобур шоҳ кўчасида ҳайдовчига қўпол муомалада бўлган ЙПХ ходими иши бўйича маълумот берилганди. Ҳайдовчига қўпол муомалада бўлган ЙПХ ходимига чора кўрилди. Бу ҳақда Йўл ҳаракати хавфсизлиги бош бошқармаси ахборот хизмати хабар берди.

Маълум қилинишича, ижтимоий тармоқда «Саводсиз, муомаласиз ЙПХ ходими» сарлавҳаси остида тарқалган видеолавҳа юзасидан Андижон вилояти Ички ишлар бошқармаси Йўл ҳаракати хавфсизлиги бошқармаси томонидан хизмат текшируви ўтказилган. Текширув хулосасига кўра, ходим Вазирлар Маҳкамасининг 2018 йил 1 декабрдаги қарори билан тасдиқланган «Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисида»ги низом ҳамда Ички ишлар вазирининг айрим меъёрий буйруқлари талабларини бузган.

Андижон вилояти Ички ишлар бошқармаси Йўл ҳаракати хавфсизлиги бошқармаси йўл-патруль хизмати ходими Х.А. вилоят Ички ишлар бошқармаси «интизомий кенгаши»га ҳавола этилган. Унинг бевосита раҳбарига нисбатан лавозим маошининг 20 фоизи миқдорида жарима жазоси белгиланган.

Аввалроқ Ангренда ЙПХ ходими шахсий автомобилида «Damas»ни қувиб юргани ҳақидаги хабарга изоҳ берилгани, шунингдек, Тошкентда фуқаро билан кўпол муомалада бўлган ЙПХ ходими акс этган видеога изоҳ берилгани маълум қилинган.